Առուստամյան, Հասմիկ Կորյունի

Տնտեսագիտություն

Այս թեման վերաբերում է Հայաստանի Հանրապետությունում օտարերկրյա ուղղակի ներդրումների (ՕՈւՆ) ներգրավման քաղաքականության հիմնական մարտահրավերներին և դրանց վրա ազդող կառուցվածքային, ինստիտուցիոնալ ու տնտեսական գործոններին։ Հայաստանի ներդրումային միջավայրը, թեև ձևականորեն բաց է և օրենսդրությամբ ապահովում է օտարերկրյա և տեղական ներդրողների հավասար վերաբերմունք, գործնականում բախվում է մի շարք համակարգային խնդիրների, որոնք սահմանափակում են կապիտալի կայուն և երկարաժամկետ ներհոսքը։ Դրանց թվում առանձնանում են շուկայի փոքր չափը, սահմանափակ ներքին պահանջարկը և աշխարհագրական մեկուսացվածությունը, ինչը բարձրացնում է լոգիստիկ ծախսերը և նվազեցնում ներդրումային գրավչությունը։ Միևնույն ժամանակ, ներդրողները հաճախ ընդգծում են ինստիտուցիոնալ թուլությունները՝ դատական համակարգի ոչ բավարար անկախությունը, իրավական կանխատեսելիության ցածր մակարդակը և պետական կառույցների հետ հաղորդակցության բարդությունները, որոնք ազդում են վստահության վրա և մեծացնում ներդրումային ռիսկերը ։